donderdag 3 mei 2018

وليدي.. آسفين على الازعاج بهل الليل


كلكم تعرفون الحرب العالميه الثانيه اللي بدت تقريبا بالـ (1935) بوكتهم من جان الترفكلايت ابيض وأسود.. آني چنت بوكتها بعدني زغير .. المهم خلي ما أطول عليكم السالفة..ساعة ثمانية الظهر جنت گاعد بالبيت دا العب بلي ست...يشن 2.. دگ الموبايل مالتي (اي لا تتعجبون.. اني من ذاك الوكت عندي موبايل)
اي اكمللكم.. دگ الموبايل.. جنت حاط نغمة مال هيفاء (بوس الواوا).. شلته.. طلع (رئيس الجمهوريه مال روسيا).. گلي: وليدي.. آسفين على الازعاج بهل الليل بس الوضعيه حيل عاوية وأنلاصت.. والجيش نصه راح بالزلك.. محتاجيك حيل.
آني صفنت.. إتذكرت أيام الطفوله.. مِن چنت ألعب دعابل بروسيا ويه إبن الوزير وجنة نلعب زوجي طنب .... أيباااااااااااااااااااااااااااااااااااااااخ شون أيام.
گتله والله عمو... إبطن عيني.. هسه بس أفوّل المولده التايگر للبيت.. رحت للحلاق ماتي أحمد صلعية .. كلتة حمادة ما اريد ولا شعرة على راسي وبعدين رجعت فرجت سنوني وحطيت جل لشواربي ..
وترست المولدة.. وچيـّـكت الدهن..
وأخذت البايسكل مالتي.. ذبيته على الخامس. وقبـّـطت سكليتر.. وودست برجلي على البايدان......و وين؟؟؟؟؟؟؟؟؟؟.. على الخط السريع مال (حله- كربلاء).. ومناك گلت آخذ يمنه على روسيا... وهيج فد نص ساعه الكة نفسي بنص موسكو.. بس شحچيلكم!!.. باردة ثلج.
شغلت التدفئة مال البايسكل و صعّدت الجامات وشغلت اغنية مال شيرين (جرح تاني)...
واول ما وصلت گلتلهم وين دكان رئيس الجمهوريه؟؟.. گلولي بحي السلابة بقطـّاع 20 زقاق 66 يم مرطبات (علاوي جرثومه) .
وصلت..
دگيت الباب.. طلع أبو مصطفى (إبن الرئيس الروسي إسمه مصطفى لأن مرته من الديوانيه).. خطيه الرجال حالته جانت زفت متخربطة اوضاعة .. حضنـّي وكام يبجي... ..... صدك جان يقهر.. وگلي الله جابك.. گتله خير عمو؟؟.. گال هيچ وهيچ السالفه..
والالمان طبوا بينه گول.. گتله عمو.. صدگ چذب شالسلفة.. اني موجود وهيچ يصير!!! خرب .......... تخسة اذا اني فلان بعد.
كلت عيني اني رايح.. منا ليومين ان شاء الله تسمع خير
طلعت رحت على ولد أعرفه بروسيا اسمه (قاسم) هذا شقاوه مال بغداد واحد بايع وجاي د يشترى لا يعرف أمة ولا عمتة فد شي خطير كووولش چان وصديقي الروح بالروح..
گتله قسومي هيچ وهيچ الفلم ..ترى اني أريد أسلحه.. گلي تدلل شتريد؟؟.. گتله اريد 65 صاروخ (أرض- أرض)..... و34 صاروخ (أرض- مي) اقصد (ارض- جو)..... و 89بي كي سي..... و فد 6784 رمانه يدويه...... و54564 لقم أأأأ قصدي لغم منوع بين مضاد للبشر ومضاد للدبابات ومضاد حشرات
و حطلياهن بعلاگه...كلهن بالدين طبعا ... اخذتهن وعدل وگٍبل للجبهه.. وين؟؟.. بالخطوط الكدامية... ما اجذّب عليكم الوضعيه صدگ چانت داچـّه (يعني تعبانه) وما ألهة والي وجثث وكاغدات مال نساتل وشحاطات مجهولة الهوية و فد واحد خبيث جان مستغل الوضعية وجان حاط بسطة ويبع حاجة بمية المهم جان المنظر مأساوي.. بس اني اخوكم خوما اخاف!! ل.. لا يابه لا كولهة لغيري... گلت للجنود انتوا لمـّوا چوالاتكم ورجعوا للبيوتكم.. مالكم علاقه.. السالفه صارت يمي وكلمن لبيتهم من دون تمطمط خلوني أعرف أشتغل.. يلة
باوعت يمنه.. يسره. ليفوك .. ليجوة..
شحچيلكم بلـ (564674534جندي ألماني) هاي هيج بس تخمين.. وكل واحد راكب دبابة منفيست حديث وديورثون جكاير سومر ابو الجيس واللي دينركل واللي ديلعب ورق واللي حاط أية بخشمة واللي يحك راسة.. بس اني تعرفوني سبع.
نصبّت الصواريخ على چتفي وصيـّحت...اني إلكم.. طبا طبا.. طاخ طاخ طاخ.. الزگه.. جيبه.. ودي.. الله.. إصلخه.. ألطمه (هاي موسيقه تصويريه).
والله صفيتهم بقوا بس 7 جنود ودبابتين واني باقيلي رمانه وعلچ أبو السهم...... شسويت؟.. لزگت العلچ أبو السهم بالرمانه وشمرتها على الدبابة.. لزگت بيها.. وچان تنفجر.
بقت دبابة وحدة.. ركضت عليها وبيدي قلم أبو النبالات (لحد يگولي منين جبته.. هوه إجه)... وبالقلم گطعت السيرفه (التايرات مال الدبابه يعني).. وگفت... گـُمزت عالقمارة.. فتحت الباب.. نزّلتهم بيدي.. واخذتهم أسرى.
طبعا وره ما هيچ سويت.. إجه الرئيس الروسي وباسني من راسي وراد يبوس أيدي جان أجرهة تدرون بي متواضع ..گلي :.. وليدي انته اقوه من گرندايزر و مازنجر ودوقفليت وكاليميرو ..
گتله:.. لا عمو ما سويت شي آني.. عادي.. وانطاني هديه سيارة لادا بعدها ما ماشيه بالچيس.. واشترولي بنطرون كتان أصلي من الصين وزوج (تكرمون) نعلان أديداس الماني. رجعت للبيت أخذتلي حمام وصليت صلاة شكر .. وشغلت المولدة.. واكلت لفة فلافل من مأكولات حمادة مخطانة (صحيح شوية الاسم مقزز بس ترى كلييييشششش نظيف)... وبعدين گعدت اتفرج (عدنان ولينا).. وعاشو عيشة مدري شونهة